كنت خارج من
كارفور المعادى الساعة واحدة بالليل و معايا ناس و شارى حاجات كتير و
عربيتى وطيت على الارض اكتر ماهى واطية اصلا.
و عشان اطلع
الدائرى فى اتجاه مصر الجديدة كان لازم الف من شوارع ضلمة و مكسرة و لا
كأنك فى القاهرة
عاصمة جمهورية مصر العربية (الشقيقة الكبرى!!!!!!!!!!).
و فجأة لقيت
حاجة لونها ابيض مكعبرة بتنزل تحت العربية .... حجر.
مالحقتش
افرمل و لا لحقت افاديه.
و سمعت صوت
خبط من تحت العربية (اماطة الاذى عن الطريق صدقة)
قلت مش
مشكلة طوبة كبيرة شوية و خبطت فى العربية من تحت... عادى (فى مصر بس ده
شىء عادى).
مفيش
دقيقتين و اشم ريحة بنزين قوية جدا جدا ,قلت يمكن بيتهيألى لكن كل اللى
معايا شموا الريحة دى.
قلت انزل
اشوف فى ايه...
يا دوب نزلت
و و راجع ناحية تانك البنزين و سمعت صوت زى ما يكون فى حنفية ميه
مفتوحة على اخرها.
و الصوت جاى
من تحت العربية.
نزلت على
ركبى و وطيت ابص تحت العربية لقيت فعلا حنفية مفتوحة , بس مش حنفية
ميه, لأ حنفية بنزين نازلة من التانك (منك لله ياللى رميت الحجر)
ما صدقتش,
معقول حتة طوبة تخرم تانك بنزين؟ ليه هو مصنوع من ايه ؟ و الطوبة
ماكانتش بالحجم الكبير اوى للدرجة دى ؟ و بعدين معقول تانك البنزين منه
للشارع على طول كدة ؟ مفيش اى حاجة تحميه ؟؟؟
مفيش حد
معايا , كلهم بنات و ستات كبار و اطفال و الساعة بقت واحدة و نص بالليل
و احنا فى الشتا و على الدائرى و مفيش مخلوق حوالينا.
